زمان و انا صغيّر كنت بحلم ابقى كبير !



صغير...طفولة....لهو....لعب.....مفردات لو طلب مني ترجمتها لفشلت فشلا ذريعا و لعدت ادراجي منكس الراس اجر اذيال من الخيبة لفشلي في التعبير و لكن....يال لكن هذه حين نحتاجها لتقلب الامور راسا على عقب و يصبح كل ما ذكر سابقا مجرد كلمات وضعت لتنفى بعد ذلك على يد لكن !



كنت وقتها طفلا في العاشرة من عمري الهو امام بيتنا في احدى المخيمات و طبعا هنا اللهو يكون اما بالتراب يخالطه بعض مياه المجاري القوية المفعول في تقوية الجهاز المناعي من اي خطر داهم و لربما خطر الحرب الجرثومية ....و انا امارس لهوي المعتاد الهبلي سمعت صراخا و ضجيجا و التفت خلفي و اذا بعشرات الملثمين!! نعم ملثمين يحملون الحجارة و قناني العصير المملوءة بسائل غريب و فلين عرف بعد ذلك ان اسمها ذو الوقع الرائع و اللكنة الروسية الثقيلة ...مولوتوف!



لم اكن ارعف ان تلك هي بداية انتفاضة 1987 و التي استمرت 6 سنوات كاملة اخذت معها الكثير مني و من الكثير و في المقابل اعطتنا لا انكر ذلك...و لكن تلك هي فترة الطفولة حيث يكون الطفل لا يشغل باله سوى ماذا سيلعب غدا او كيف سيدبر المقالب ...احلام بريئة و عقول ( على الله تعود بهجتنا و الافراح ) ...كل ذلك مضى في غمضة عين لتحل محلها رصاص و طرق ابواب لا يكل و لا يمل و حيث ان بيتنا كان على الشارع الرئيسي حيث طرق الجيش و المستوطنين و حيث اننا مخيم يعني _ محروقة بصلة اللي خلفوهم ) فكنت كل ليلة اكون فريسة للجيش الذي يقتحم البيت مطالبني بمسح الشعارات و انزال الاعلام و تنظيف الشارع من الاطارات المشتعلة لاعود الى البيت اسودا مغبرا و ذلك الاحمرار المعتاد على وجهي طبعا بعد ان يصر الجنود على توديعي بكفين و ( شلوط ) محترم ( بالبسطار ابو حديدة من قدام )..المهم انني طول تلك الفترة في البدياة و انا اعتقد ان تلك هي الطفولة و ان كل اطفال العالم يجب ان يعيشوا مثلي و لكن اكتشف عبر شاشات التلفاز انه لأ..والله العظيم لأ !

الاطفال عايشين مثل ما الكتب بتقول و حسب المرشدين الاجتماعين ما بينصحوا...يعني اطفال يا عمي اطفال.



ما علينا ...اجت السلطة الموقرة و طبعا ما حليلها تيجي غير و انا في سن المراهقة و ( بلشنا ) نشوف الحفلات الغنائية و النجوم العرب بيتسابقوا مين بدو يجي يغني نار نار و اللي بدي ليه ما نحلمش و محلات الخمرة اترخصت و الناس صار عندها انفتاح اخلاقي ما شاء الله و اللي كانت تخهاف تلبس القصير خوف من ( اللطّ) بالبندورة على وجها من الناس في نص السوق صارت ( التايت ) و ( الباضي ) و المحزّق و الملزّق يعني طوشة و قايمة فكانت افضل فترة مراهقة للانسان علشان يصقل فيها شخصية قويمة و حميدة و ذات سلوك حميد!!!! الله لا يخلف عليهم



شو النا بالطويلة خلينا بالقصيرة دخلنا بمرحلة الشباب و بناء المستقبل و التحصيل العملي و الثقافي العالي و محاولة تصليح اللي انكسر و كنت في شغلي الاضافي بعد الجامعة و بسمع الراديو و اذا بخبر شارون اللي يجيب خبرو ان شاء الله ...قولو امين ما تخافوا ...و قامت انتفاضة الاقصى من اربع سنين و الله اعلم ايمتا راح تنتهي ...و طبعا لا ضل فيها بناء و لا سخام و المخيم بعدو مخيم ...اجتياحات و شهدا و بتصحى الصبح على خبر ان صاحبك استشهد او قريبك اعتقل ! لدرجة والله صرت اخاف من الصبح و شو بجيب معاه





الموضوع اني خايف





من شو؟؟؟





هسة بقولكم...مش خايف من اللي بصير والله انا صرت اخاف من اللي جاي لانو صار عندي عقدة اسمها ( عقدة مراحل العمر) !

يعني مرحلة الطفولة و ضاعت و مرحلة المراهقة و بح و هاي مرحلة الشباب و عيّدت كل عام و انتو بخير ...يعني على هيك في مصايب على الطريق يا جماعة الخير



متبقي عنا مرحلة النضوج اللي هي في الثلاثينات و بعدين مرحلة الركازة و الحكمة و منتصف العمر في الاربعين لما تصير تشوف الدنيا غير و اخر شي عنا مرحلة الكبر و الشيخوخة اذا وصلتها طبعا

يعني في ثلاث اربع مصايب على الطريق بس صدقوني ما خايخ غير من مرحلة الكبر و الشيخوخة...يا ترى شو اللي راح يصيرلنا فيها و شو راح نشوف منت ذل و اهانة و مصايب طبعا ما بشيبلها الراس لانو شاب من هسة...



يلا بالاذن خلينا اقوم اطفي الضو اللي برة بلا ما يمرق جيب الجيش و يقعد يتصايب عليهن و يمارس هواية الرمي زي كل ليلة





تصبحوا على وطن !