انتخيت بحرف ينبض بالمعان=قلت تكفى وانت لاحساسي سفير
وسط برد القاهره شفت الهوان=وانقلبت لنار في وسط السرير
من خفوقن مشتعل صابه جنان=من خفوقن طاح في حبه أسير
كان ياماكان في ذاك الأوان=الحكايه حب وبصدري سعير
اقطع الموجه وغن باسرع أوان=كل عام وعايشه بالفين خير
نور المسرح طفى ضو الحسان=صاحت الدنيا هديرن في هدير
والتفت لعايشه والعشق بان=وانقلب شكلي ولايبشر بخير
قامت الحلوه وأصدرت البيان=لازم اتعرف ويصير الي يصير
من مكاني رحت بوفيه الطحان=الطعام اصناف واشكاله كثير
كانت قبالي ولاحظ حرف كان=وهربت مني جهة صحن الفطير
رحت انا بحجة فطيره لي كمان=صرت نشبه وقتها مالي نظير
طنشتني وابعدت والخلق شان=وراحت لقدر وغطا فوقه صغير
ماقوت رفع الغطا وقالت فلان=قلت خالد آمري لو بالعسير
قالت ارفع هالغطا قلت الرهان=قالت اطلب قلت انا قلبي كسير
عايشه وش جابك بنفس الزمان؟=ليتني ماجيت أو كنت الضرير
كيف في قلبي بنيتي لك مكان=في ثواني عبر موجات الأثير
في عيونك بحر وامواجه أغان=تغري المفتون بالرمش الحرير
واختلط في حرفها سب ولعان=صدق فاشل والله محتال وحقير
من تحرش فيني يستاهل يهان=ممكن تفارق وعن وجهي تسير
وانتفض قلبن من النبضه جبان=وصار يصرخ أصبح الموقف خطير
(تو ياقلبي حلا عمري وزان=اركد شويه وخلك لي عشير)
وش بلاك انتي بك طولة لسان=ومن يشوفك يقسم انك ماتضير
ليه وش سويتلك صرت المدان=المدان الرمش والكحل المثير
لن جمالك ماحصل لانسن وجان=لاتلوميني جمالك والله غير
وكنها يوم سمعتني الحرف لان=قالت آسف بس مدحك جا غزير
وخفتت بالصوت قلت الحظ حان=قالت ابغى شخص بامواله أمير
يووه وش تبغين به المال فان=والصغير ان زاد ماله مو كبير
باوعدك وبقلب مامره وخان=لكن البلشه سكن صدر الفقير
وخزرتني وقلت انا خسرت الرهان=باخذ المشوار احسن من قصير
كنت آمن أول النار الدخان=قلت اجرب والله بحكمه قدير
وارتفع فجأه صدى صوت الأذان=وانتفضت لصوت حسيته نذير
وابتعدت وحرت عشرين وثمان=كل عمري راح وانا بذنبي أسير
مع سهام ومع منال ومع روان=مع أميره ومع مها وحتى عبير
باحجز بمقعد على اول طيران=واعلن الحاله وبطبول النفير
بابتعد عن شرن بنية قران=بابتعد مليت انا تحت الهجير