خلاص إنسى لا تجيني ولا أجيك = كل الذي بيني وبينك محيته
منتب كفو قلبٍ يحبك ويغليك = خلاص قلبي في هواكم عصيته
يا النذل كم ليله وانا اسهر واناديك= يالخبل كم جمرٍ لعينك وطيته
نذرت عمري لك ولا هوب مكفيك= (بالله قلي وش بقى ما عطيته؟)
أزعلت كل القوم أبغي أراضيك= كنت الوحيد الي بعمري شريته
ياجازيٍ حبي بقسوة تغليك = اليوم قلبك بالقساوه جزيته
باعك خفوقٍ كان بالعمر شاريك= رح دور الي بحبنا اشتريته
لا تحسب اني لا صحى الشوق باجيك= درب المذله لا حشى ما مشيته
وان كان تبغاني اناديك وارجيك= مسكين ما تدري بمنهو هويته
عامين والخافق يصونك يراعيك= عامين قاضيها بلعله وليته
لين اتضح يا خاين العهد خافيك= وتبين الي عن عيوني خفيته
وصحيت من حلمي وانا زاهدٍ فيك= ونهيت دربٍ في هواك ابتديته