يالله حيهم ..


هذا الموضوع بالعاميه من الفه الى يائه وبننزل تحت شوي عشان العجازين اللي يقرون من برا لا يجوننا .
.


.


.


.


.


.


أخواني .. اسمعوا او اقروا هالسالفه وتأملوها وهي سالفة حقيقية حصلت في نجد قبل اكثر من ثلاثمية سنه ..

يقول صديقي ابو محمد يوم سألته عن قصة دخول الاسلام لوادي الدواسر :-

يقول جداننا اول بدو ومسلمين ولكن ما تعمقوا بالدين .. وكان فيه رجال من الجماعه يقال له ربيِّع مطوع وراعي دين ولكن ما عنده علم ( على حد تعبير ابو محمد ) .. فذهب ربيّع للخارج يقصد الدرعيه ودرس على يد الشيخ محمد بن عبدالوهاب رحمه الله لمدة شهر وعندما هم بمغادرة الدرعية راح للشيخ محمد وقال له .. يا شيخ انا جيتك من ظلام وربعي جهلاء ما يعرفون بالدين وش تنصحني ؟

فقال له الشيخ ادعهم للدين بعد ان تدعوا نفرا منهم يساعدونك على نشر الدعوه واستعن بالله والدعوه يبي لها صبر .

ورحل الشيخ ربيّع من الدرعيه قاصداً اهله بوادي الدواسر فلما وصل اقيمت له وليمة على شرفه حضرها كبار القوم وصغارهم وذبحت له الذبايح ترحيبا بمقدمه من الخارج ( خارج الوادي )

المهم الشيخ ربيّع قام يعاين في الحاضرين وما تكلم حتى تعشى الجميع ولما جلسوا قال ربيّع :

يالربع انا جيت من نور الى ظلام .. فانتم مسلمين بالاسم ولا تؤدون الفريضه في المسجد وتراكضون ورا ابلكم وغنمكم ولا اديتوا حق الله عليكم .. وترا الصلوات خمس الظهر والعصر والعشاء على اربع ركعات والفجر ركعتين والمغرب ثلاث ركعات .. وابيكم تؤدون حق الله عليكم في المسجد مهوب عند ابلكم وغنمكم .. وبدأ صوت ربيّع يرتفع ويهوش عليهم رغم انه ليس اكبرهم سنا ولا مقاما .

فقام كثير من الموجودين وتركوه ولم يبقى حوله الا جماعته اللي ناصروه فزعه والا هم بعد ماهم جايزن لهم الحكي بس الشكوى على الله ولدهم ولازم يقومون معه !!

المهم بعد فتره تحالف مع جماعته عدة جماعات وفخوذ من الدواسر وبدأت فكرة الجهاد وقتال الكفار ( لأنهم ما يصلون بالمسجد معه ) ..

فوصل العلم للآخرين ( الكفار ) ان ربيّع وحلفائه مصرين ومعزمين على نشر الدعوه بالقوه وفرض الصلاة بالمسجد على الجميع ..

فاجتمعوا وعددهم كبير وقالوا لن نقاتل بني اخينا عشان ربيّع .. لكن حقناً للدماء بنروح لربيّع ونفاوضه .. وراحوا له وقالوا له يا ربيّع حنا عيال عمك وترانا ما نبي المقاشر والمذابح بين عيال العم ونبيك تخفف الامور عنا شوي والدين يسر وابشر بعزّك ..

فانفعل ربيّع وطردهم وقال لا تجادلوني في حق الله .. والله إن آخذه من ورا خشومكم !!

طلعوا من عنده وهم بلشانين والخيار الوحيد اللي امامهم صعب وهو القتال وبتصير مجزره ودم بين عيال العم !!

قال عاقل منهم ارسلوا لربيّع مرسول وانتم تنازلوا شوي وهو يتنازل شوي .. فارسلوا له مرسول ودخل على ربيّع وقال يا ربيّع .. الربع ارسلوني لك ويقولون اما صلاة الظهر والعصر والعشا فالله بيعيننا عليها معك بالمسجد .. لكن الفجر والمغرب نبيك تسمح لنا فيها نصليها عند حلالنا لأن الفجر نقوم بحلالنا ونصدرها والمغرب نرجّع الحلال لبيوتنا ..

فأخذت ربيّع العزة بالإثم وقال يعقبون .. مير وغير الخمس صلوات في المسجد يصلون الوتر ركعه معي ويدفعون الزكاة بعد .. ما بقى الا هالكفار يتشرطون

رجع المرسول للربع وقالوا له بشّر ؟

قال ابشركم زادكم يقول الوتر والزكاة من ورا خشومكم

قالوا اجل الوعد قدام

وبدأ تجمع الحلفاء واستعدوا للحرب والقضاء على ربيّع ومن تحالف معه من جماعته او من غيرهم وشالوها عرضه ( عرضة الحرب ) وهم متجهين لربيّع يقضون عليه وهم يغنون ..

أربيّعن عودن هبيـل
يبغى على الوادي زكاه
لعيون ابو رمشٍ طويل
ما عاد نركع للصـلاه


وقامت الحرب بين الجماعه وهرب ربيّع من الوادي .. ولا يعرف احد مصيره منذ ذلك الحين . وبعد هذه الحادثه تغيرت الامور وبدأ اهل الوادي تدريجيا الالتزام بالصلاة في المسجد بعيدا عن عباطة ربيّع

انتهت قصة ابو محمد

فماذا نستنتج ونستخلص من هذه القصه الحقيقة !!

اولا :- ان ربيّع لم يأخذ العلم الكافي اللي يؤهله للوقوف في هذا الموقف فمدة شهر غير كافيه لأخذ دورة اله كاتبه فما بالك بمن يفقه الناس بدينهم .

ثانيا :- ان الدين انتشر ومن بداياته بالتدريج ولم يأتي في ليله واحده بكل احكامه .. وهو ما اراد ربيّع تطبيقه على ربعه من اجل الزعامه .

ثالثا :- الداعيه لا تأخذه العزه بالاثم او العباطه كما يصفها ابو محمد بزيادة شرط الوتر ( من باب العناد فقط ) رغم انها ليست فريضه مثل الزكاة .

رابعا : لم يراعي ربيّع خصوصية جماعته في كل ما يتعلق بالعناد فهم قوم مسالمين لكن مافيه شي يجي معهم بالغصب والدليل شيلتهم بالعرضه !!

خامسا :- لم يراعي ربيّع قوله تعالى ( وجادلهم باللتي هي احسن ) بل ارادها من ورا خشومهم رغم علمه بأنهم لا يمتنعون عن كفر بل يمتنعون عن جهل وانهم لا جت العباطه ما اعبط منهم احد.

سادسا :- لم يوضح لهم ربيّع الى اين تذهب هذه الزكاة هل هي لفقراء الوادي ام سيؤديها للفقراء بالخارج ( خارج الوادي )


وزبدة الموضوع هي في السؤال التالي ..

كم ربيّع بيننا اليوم .. رغم اننا لسنا في حالة جهل كما كان في زمن ربيّع وكم ربيّع بيننا يجادل ويخاصم في امور واختلافات فقهية ويكفّر بها هذا وذاك مما انشأ تياراً مضادا لكل ما يقوله امثال ربيّع حتى وان كان ما بعض ما يقوله صحيحا

افلا نعتبر من قصّة ربيّع ؟

فالمتأمل لأبيات عرضة الحرب يجد انهم في البيت الأول .. وصفوربيّع بالهبيل لأنه بياخذ عليهم زكاة وهذي مشكلته انه ما اوضح لهم انها ستكون لفقرائهم

والبيت الثاني اللي اعلنوا فيه مقاطعتهم للصلاة برمتها بدأوه بقولهم ( لعيون ابو رمش طويل ) .. ليزيدوا على تطرفه .

فهل هداهم اسلوب ربيّع أم قادهم لتطرف اسوأ ؟


اتمنى ان يعتبر كل ربيّع في ايامنا هذه من قصة ربيّع .. فديننا ولله الحمد دين يسر لا دين تكفير وتنفير ولندعوا جميعا لسبيل ربنا بالحكمة والموعظة الحسنه كما أمرنا .


اقول قولي هذا واستغفر الله لي ولكم

نقلة لكم الفقير الى ربه

القوطي ..