يا باب سلّم لي على من ورا الباب = و قلّه بقلبي .. لو تخفّى .. أشوفه
أسمع حنينه يخترق ستر لحجاب = وهو ساكتٍ .. ما أطربتني حروفه
ياللّي سكوته زادني اعجاب فاعجاب = وياللّي كلامه ما وسعني وصوفه
وصلت مراسيلك على ظهر لكتاب = لكنّ شمسك طوّلت في كسوفه
إنت السهّر لا سَلطن النوم أحباب = و انت الـ ( طِفا ) لا شعلل الشوق جوفه
ما جيت لك أحمل على سترك عتاب = أصلا عطورك رايحتها امْعَروفه
خوف الوفي ما هو على قلّ لاصحاب = الوافي اللي من ( ضنا البعد ) خوفه
نار الموادع ما تطفّيها لاسباب = ما به سبب ( ياخذك ) إلاّ .. أعوفه
راس الغلا توّه غضيّ ما بعد شاب = ما يحجبه عن شوفك إلاّ .. حتوفه
والباب ياللّي يحجب عيون الاغراب = ما يحجب عيونٍ عليك امْلَهوفه
ما ردّني عنّك ملايين لاشناب = تهقى يفرّق بيننا ... باب طوفه ..؟!!