يوم في حياة عضو الحلقة السادسةمع .. نعناعه - الصفحة 3

* نعناعة * · 11-03-2006, 09:30

عدنــــا ,,

السلاااام عليكـــم ورحمة اللـــه وبركاته ,,
واللي في جيبك هاته

أول شي حابة أقــول ,, مساء الخير على كل من مر من هنا ,,
حياكــم الله في هذه الصفحــة المتواضعــة ,,

أما الحين ..
إليكـــم تفاصيل يومياتي ,,
من طأطأ ,,, إلى السلااام عليكم

يا جماعة الخير ,,
أول شي اتفضلوا الشاي ,, والقهوة ,,
مافي شي من واجبكم ,,
البيت بيتكم يا إخوان

>>>>>>>>>>>>>> ديوانية !!

المهم ..
أنا عادة كل يوم أقعد الساعة 5 في الأيام العادية >>>> ليش فيه أيام توماتيك !!

أقصد الأيام من السبت إلى الأربعاء,,
على ما أصحصح .. وأتوضأ ,, يكون أذن الفجــر ,,
أروح أصلي ,,
وأبدّل ملاابسي ,, وأجهز نفسي عشان أنطر باص الكليــة ,,
الله يسامحه أبوي ,, أقول له خلني أروح بالسيارة وارتاح من دوخة الباص ,,
يقول لأ .. الطريف بعيــــد وأخاف عليج >>>> طلعت الليسن من يومين .. وفرحانة فيه

المهم .. على مايجي الباص .. أكون سويت لي كوب نسكافيــه يعدل المزاج على الصبــح ..
لأني ما أحب أتريق (( أفطر )) الصبح ..
والوالدة حبيبتي .. تعبتها وياي ,,, تقول اتريقي قبل لا تروحين ,,
وأنا ..... (( ان شالله يمة .. بس عشان خاطرك ,, بس لقمتين ))
وبعدين .. يشرف الحبيب باص الكلية .. بعد ما مر على بنات المنطقة .. وأنا يمرني آخر وحدة ..
** مسوي فيها مسك الختام معاي **
الباص يوصلني على الساعة 6:20 بالضبط ماشالله عليه ,,
كل يوم على نفس الموعد
وبعد ساعة إلا خمس دقايق .. يعني 7:15 أكون عند باب الكليـــة
والقى البنات واصلين .. قبل الشحادة وبنتها !!
ومجتمعين في الكافتيريا ..!!

والساعة 8:00 ندخل المحاضرة الأولى ,, وكل يوم تبدأ في موعد ..
يعني السبت .. تبدأ 8:00 إلى 10:00,,,بعدين بريك 4 ساعات ,, والمحاضرة الثانية من 2
الى 4
الأحد من 8 الى 10 محاضرة وحدة ,,
الاثنين من 10 الى 2
الثلاااثاء والاربعاء من 7 الى 12
>>>>>>>>>>>>>>>>>>>> والله دوخة وتعب

ما أرجع البيت إلا وراسي بينفجر .. حشى قنبلة موقوتة !!
أدخل البيت .. وأبوس راس الوالد والوالدة ,,
وألقى صحن الكبسة .. وعليه ذيك المكسرات الطيبة .. وجمبة المرق اللي يحبه قلبي.. يم يم يم يم يمـــي
>>>>>>>> اللي يسمعني يقول هالبنت بوتمبه وسمينة ,, واللي يشوفني .. حيل ضعيفة !!
وبعد ما أتغدي ,,
أمسك الجريدة وأقرأها .. بالعكس .. يعني من آخر صفحة أبدأ
وأكمل قراءتها بالعكس ..
>>>>>>>>> لا أحد يضحك عليّ ... ياويله

وبعدين أشرب القهوة مع الوالدة وأخوي اللي بالثانوية واختي اللي أكبر مني ..
هذا اللي يصير تقريبا كل يوم .. أما بالنسبة للوقت اللي بعد المغرب ..
كل يوم تقريبا أسوي فيه شي ..
اذا كان عندي دراسة .. طبعا أذاكر أول شي ..
وبعدين اذا كان ضايق خلقي ...>>>>>>>>> أروح الخياط أوسعه ( أعرضه ) شوي
لا أمزح ..
ياخذني أبوي الممشى ونتمشى هناك ..
ويوم أروح السوق مع الوالدة .. ويوم آخذ اخواني الصغار بالسيارة في المنطقة أدور فيهم

وطبعا أغلب الاوقات .. أدخل أطياف ..
أغلى مكان عندي .. واذا ما دخلته .. أحس شي كبير ناقصني ..
ماتتصورون شكثر أعشق أطياف باللي فيها

أما بالنسبة ليومي الخميس والجمعة ..
أحلى يومين عندي .. لأنهم عطلة .. ومافي محاضرات >>>>> شريرة هالبنت
تقريبا أقعد على الساعة 9:30 أو 10 .. فاضية ما وراي شي ..
بس طبعا .. أكون قاعدة قبلها على صلاااة الفجر .. أصلي وأنام ..
أقعـــد .. وألقى اخواني كلهم قاعدين ..
اللي يتريق .. واللي يسوي نفسه يذاكر
واللي يتهاوش مع الثاني .. وحالتهم حالة ..!!
وعلى الساعة 11:30 تسوي أمي الغداء وأروح أساعدها ..
بس ما أخفي عليكم .. أمي عليها طباخ ..
إنمـــا إيه ...يمممممممممممممم .. ماشالله عليها ..

يوم الخميس والجمعه حيل أحبهم .. لأن نجتمع كلنا على الغداء .. لأن الأيام العادية ..أتغدى بروحي

وبعد الغداء .. أشرب الشاي مع الوالد وأقعد أسولف له عن أطياف
ليما ينام ..
>>>>>>>>>>> كني الجدة اللي تحكي لأحفادها قصة قبل النوم
يا حبيبي يا أبوي ..
وبعد المغرب .. بعد الصلاااة ..
أروح مع أهلي لبيت عمي .. أو نروح البحر .. عند أبراج الكويت .. أفضل مكان عندي ..
واذا ما طلعنا .. أدخل أطياف ..
وبين الفترات اللي ما عندي فيها شي..
أروح غرفتي وأسكر على نفسي الباب ..وأكتب لي كم بيت شعر .. أو قصيــدة اذا كنت رااايقــة ,,

أدري طولت عليكم .. ولو خليتوني بعد ..
رح أكتب لكم قصة حياااتي كلها

هذه تقريبا يومياتي ...
وسامحونا على الاطالة ..
أدري .. عورت راسكم

تحياااتي ومودتي..
وااااااي تعبت حيــــــــــل ورقبتي عورتني من الكتابة ..!!!

عاشقة أطيـــاف للأبد
كل الحب

* نعناعة * · 11-03-2006, 09:36

اقتباس:

المشاركة الأصلية كتبت بواسطة O o نوافــ o O

بصراحه ضيفه اسمها قوي ولها بصمة فيل في المنتدى ماشاءالله عليها ,,,

اكيد راح يكون يومها غير ننتظر ونشوف ..!!

هـــلاااا ومليووون مرحبا ..
حيــا اللــه نواف .. هلااا يا مداوووي

منور يا أخووي ..

أشكرك على هالروائع .. وهالكلااام الحلو..
كعاادتك... دوما في المقدمة ..
أتشرف بحضورك يا نواف

أختــك .. نعناعة

آهـــات · 11-03-2006, 09:46

وش هاليوم المنعنع من أوله..

و أنا اقول ليش الوناسة اليوم عليها أكبر ابتسامة.. هذا عشانك دورك يا حلوة

ما عندي اسئلة ثقيلة..

- ما هو تخصصك في الجامعة؟؟

- بما ان الوالدة طباخة ماهرة ما شاء الله عليها.. ليش ما تلطشين منها طبخات "سنعة" و تنزلينهم في مطبخ أطياف؟؟؟

- نعناعة اختفت لفترة زمنية.. ثم عادت و هي بكامل نشاطها.. أين كنتِ؟؟؟؟؟؟

تراني موجودة.. بشوف اسئلة الجماعة.. و لو تذكرت شي برجع..

ممكن شاي

* نعناعة * · 11-03-2006, 09:54

اقتباس:

المشاركة الأصلية كتبت بواسطة أمــيرة الكـون

السلام عليكم ورحمة الله وبركاته
ღღ مساء الورد ღღ
نعنوووووعة
أولاً مبروك الليسن مرة ثانية
ثانياً ماراح أتسربع هالمرة .. بنتظر يومياتك وبرجع لك

الله يحفظك يارب

هلاااااو غلااااااااا بأميرتنا ..

هلاااا بالغلاااا كلــه
وعليكم السلااام ..

والله يبارك في حياتك ..
وان شالله يمكن على يوم نطلع أنا وانت اذا جيتي هنا الكويت (( وجه يغمز ))

بانتظارك يا أميرة الكون ..

صدق كنان الليل لما قال .... (( أميرة الكون .. أميرة مو بيدها ))

كل الحب ..
تحيااتي النعناعية

* نعناعة * · 11-03-2006, 09:58

اقتباس:

المشاركة الأصلية كتبت بواسطة الحمامه الجريحه

نعـنوعـه
لا تطولين .. نـنـتـظر .. !

حمامة أطياف ,,
التي أينما حلقت ,,
نثرت من بين جناحيها ,, الابداع والروعة ,,

كل الحب
أنا الآن في انتظارك

تحيااتي النعناعية

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

يتصفح الموضوع حالياً : 1 (0 عضو و 1 ضيف)

الأتصال بنا \| الأرشيف \| الأعلى
	Powered by vBulletin® Copyright ©2000 - 2007, Jelsoft Enterprises Ltd. Search Engine Optimization

الإهداءات
هـــــــمـــسات : كل عام والجميع بخيرجمعة مباركة لأهل اطياف بلوتوث : صباااح الخيــــــــــــر العبد الفقير : كل عام وأطياف بخير اضافة اهداء