تم قبل شوي اعلان حالة الطوارئ في كافة انحاء منتديات أطياف ، وكل مداخلها ومخارجها وتم عشان كذا تقفيل كل البيبان ومحاصرة كل الاركان وسد جميع الجحور والجدران وذلك ماله أي علاقتن في التطورات الحاصله في المنطقه ولا الحرب الي بتشب على العراق ..
السبب هو اختفاء المشرف على الوناسه والمعروف باسم ( الوسيم ) ؟!
وتشير الدلايل لعدم وجود اثر له من كم يوم .. ونظرن لأن راس مرزوق مطلوب من الكثير من المنظمات الاتحاديه للمصاله فمهوب مستبعد ان يكون هذا العمل ارهابيا
هذا ولين الحين مابعد حددت أي جهه مسؤوليتها عن هذا الحادث
من القناة الاطيافيه للاخبار
كانت معكم مراسلتكم في تسبد الحدث
كلثوم/ أطياف الوناسه
وفي ذيك الاثناء .. ((بنت الجنوب))
- بنات سمعتوا الخبر ؟؟
- ايه سمعنا وتراها في وجيهنا مانقدر نقعد متربعين نقشم حب ( هوايتهم الدائمه ومشرفنا مختفي ... لازم نفزع وحنا بنات الوناسه
- يالله قداااااااااااام
يركضون البنات .. ويركضون .. ويركضون ... ويركضون (حشى صار ملعب كوره
لين وصلو غرفهم ( الحمد لله على السلامه ) وطلعت كل وحده منهم خلاقين الشغل وعدة السباكه .. احم قصدي عدة البحث والتقصي ( مشكله الي يندمج في الدور ) وينطلقون طواااااالي لموقع الحدث
في الموقع
- معكم ملائكة تشارلي ( ياشين الي يطالع افلام واجد ) جينا نفزع معكم ونكشف ملابس الحادث ( ملابس ولا هدوم )
- المسعول عن قضايا الرهائن والاختطافات :
مابقى الهي بعد .. نجيب بنات يحلون محل الرجاجيل .. قال ملائكه قال هـــع اقلبوا فيساتكم بس ( يقطع ابو التحطيم ياشيخ )
فجأه تتحرك المتحريه(( اهات)) في حركه مباغته وتصمخه على دمجته وتشيله وتنزله على ركبتها الا الرجال رايح في خرايطها .. ( عربجيه البنت )
تضحك التحريه ((اهات)) بشماته وهي تقول .. من هالحين ورايح حنا الي بنمسك التحقيق انقلع فيذاك انت وصلعتك الي تسنها صلعة احمد رمزي عقب ما شيب ( والله تعرف تشبه البنيه)
الادله
اول شي سووه البنات انهم حاصروا المنطقه الي يتقوقع فيها قحطه ويمارس منه عمله الاشرافي (منتدى الوناسه ) ومنعو احد يطلع منه او يدخل الا باذنهم ثمن قسموا الشغل بينهم واستلمت كل وحده منهم جبهه وبدا الشغل ..
كان همهم انهم يلقطون أي شي يلقونه غريب او ممكن يساعدهم وصاروا يجمعون الادله واحد ورا الثاني لين امتلى الكرتون عندهم ، بعد ماقضوا رجعوا للقاعده ( مهيب قاعدة ابن لادن|1| ) وقاموا يحللون الاشياء الي لقوها ..
قرطاسة كت كات ، قوطي ببسي فيه نص ، علك ممضوغ ، عود اسنان
التحريه لؤلؤة الخليج: اقول يماااال البلا من الي جامع هالبرابيس؟
التحريه الزهره المثمره : انا الي جبتها قلت يمكن فيها بصمات ولاش
التحريه روان ( نابت في راسها نخله ) : انتي يبيلتس رفستن عشان تنعدلين وش الي بصمات انتي الثانيه
التحريه كبرياء الشموع: الظاهر انها شربت السالفه وتحسبنا في جريمة صدز خخخخخخ ماتدرين انه موضوع في الوناسه
التحريه الزهره المثمره : الا ادري بس قلت نعيشهم الواقع
التحريه اهات : وش واقعه الله يخلف عليتس .. انهجي بس لا يملون وحنا مابعد وصلنا اخر السالفه
يستمرون في تطليع الادله ( السنعه هالمره ) وكانت الاشيا الي لقوها هي :
• خيط جزمه لونه ابيض ( اكرمك الله )
• بقايا سيجاره ريحتها مخيسه من نوع (مهوب لازم عشان مانسوي دعايات )
• خاتم حق المصبع الصغير مدري وش يسمونه محفور عليه حرفين RJ
• ورقه صفرا منعفطه مندعستن ورا الكنبه الي اول ماتدخل المنتدى العام تلقاها في وجهك ..مكتوب عليها ( يمديك تتحسف على الي سويته معي )
• بقعة دم على الزوليه الي في مدخل المنتدى .
كانت هذي اهم الادله الي لقوها ..
الحين لازم انهم يشوفون هالادله اذا بتفيد في شي او لا لان يمكن انها ترجع كلها لمرزوق ويرجعون للصفر !!
بعد السؤال والتحقيق مع مجموعة من معارف الضحيه ( صار ضحيه الضعيف) تم اكتشاف التالي :
• الورقه المنعفطه بعد مقارنة الخط الي فيها مع خط مرزوق طلع فيها فرق واضح جدن يعني الورقه مهوب هو الي كاتبها .
• خيط الجزمه الابيض صار خيط جزمه رياضيه وبعد دق الحنك مع معارف مرزوق اكتشفنا ان مرزوق مايلبس جزم رياضيه وماحيلته الا زبيريه وحده ومقطوعه بعد من كثر ماهو يكرفها ولاعنده غيرها.
• الخاتم شي طبيعي انه مايكون لمرزوق لان الحروف الي عليه ماترمز لاسمه وبيصير غبي ان لبس خاتم مهوب يرمز له .
• السيجاره المخيسه بعد تحليلها ومعرفة نوعها ومراجعة اقوال الشهود عرفنا ان مرزوق مايدخن ولو حصل وطقت في راسه ودخن مهوب مدخن هالنوع !!
• بقعة الدم الي على الزوليه يوم ارسلناها للفحص طلعت النتيجه انها ترجع لشخص فصيلة دمه L- ومع مراجعة ملفات مرزوق الطبيه صارت البقعه مهيب له لأن فصيلة دمه K#
بس لين الحين مافيه شي يثبت ان مرزوق مخطوف يمكنه قاطعن اشاره ولا ذابحن له واحد ومنحاش .. كلش جايز
كل وحده من البنات قامت تحك راسها ( لايطيح القمل
) تحاول تطلع بنتيجه من ورا هالادله الي لقوها .. ماش حكت الراس ماتنفع يبيلها قعده وترمس شاهي بالحبق وكيس حب عشان يقدرون يجمعون
( ودي افهم السر بين الشاهي والحب والتفكير السليم ؟ )
تبرعت التحريه اهات بانها تروح للمطبخ الموجود في منتدى الاسره عشان تصلحه وبينما هي تتمخطر في الطريق من الوناسه الى الاسره وانتو عارفين المشوار طويل ...( ترى هنا تدخل موسيقى الرعب ).. واذا بشين طايرن يمشي مليووون صاقعن جبهتها ويطلع على اثره صعرور وش كبره ، ترفعه وهي تسب وتشتم شوي الا تقوم تقلب فيه ( من اللقافه طبعن ) وتكتشف ان الي صقعها زبيريه مقطوعه ملزق فيها ورقه بغرا ابو نص ( اموت على الدقه ياناس )
وين جت هالزبيريه معه ؟
تستوعب اهات ان احد مسطحها مع السور حق اطياف كل هذا وهي في الطريق مابعد وصلت الاسره (بدا المخيخ يشتغل اخيرن )..
قامت تركض ومعها الزبيريه وعطتها البنات وهي تشرح لهم الي صار
فتحوا الورقه الا فيها رسالة تهديد من مختطفين مرزوق يقولون انهم بيذبونه مع السطح لو مانفذنا مطالبهم وموقعه باسم ( مافيا اطياف) وقالو انهم بيرجعون يسطحون لهم الزبيريه الثانيه مع التفاصيل
وعشان يتأكدون البنات عرضوا الزبيريه على الموجودين .. وهم يسألون اذا به احد يعرف منهي له ؟
تقدم منهم واحد وقال لهم ايه هذي زبيرية مرزوق المقطوعه مغيرها ..!!
التحريه كبرياء الشموع: من انت ؟ ووشلون عرفت انها له
ذاك الواحد : انا ( نايت ايكو ) صديق مرزوق واعرفه منذو مبطي واعرف زبيريته بعد
التحريه كلثوم: كبرياء تأكدي اذا اسمه موجود في القايمه عندنا
خلاص رح اقعد محلك .
التحريه الزهره المثمره للتحريه بنت الجنوب : اقول الارنب يلعب في راسي ما اقتنعت بكلامه
التحريه كلثوم : يبيلنا نحط عينا عليه
المشتبه فيهم
ملائكة تشارلي عقدوا اجتماع عسكري مسكر عشان يحلون فيه القضيه
* قايمة المشتبه فيهم كانت تشمل كل الي عندهم دوافع او مصالح من خطف مرزوق واغلب الي كانو فيها هم اعضاء تسلط عليهم مرزوق
* من ضمن الي اشتبهوا فيهم كانوا ( البرق الساطع ) و ( النظر الثاقب )
لكن شالو النظر من قائمة الاتهام لان النظر الثاقب كان مسافر وسير علينا عنده حجة غياب قويه يوم شهدوا معه ربعه كلهم انه كان معهم في الاستراحه وقت اختفاء مرزوق
وبدو يلفون على كل دليل ويقارنونه مع الاثباتات والتحقيقات الي عندهم بعد كم يوم اكتشفوا :
• الخاتم الصغير بعد حصر قايمة الاسما لقوا ان الحروف الاولى المحفوره عليه Rj تطابق اسم ( رعد جده ) .
• بقايا السيجاره بعد مراجعة البصمات الي عليها اكتشفوا انها ترجع لـ ( النايف ) هذا غير انه هو الوحيد الي يدخن هالنوع من السجاير
• خيط الجزمه الرياضيه بعد دوران على محلات الرياضه ومعرفة نوعه والبحث والتحري .. صار يرجع لـ (نايت ايكو) والي طابق هالحتسي انهم لقوا اثناء التفتيش في اغراضه وحده من جزمه الرياضيه تطابق نفس النوع والوصف خيطها ضايع !!
• الورقه المنعفطه بعد مقارنة الخط الي فيها مع خطوط المشتبه فيهم لقوها تطابق خط ( الدكتور ) ونفس نوعية الورق المستخدمه لقوه عنده
• فصيلة الدم الي لقوها على الزوليه بعد مقارنتها مع سجلات الاعضاء الطبيه ولان هالفصيله نادره لقوها تطابق فصيلة دم شخص واحد وهو ( الامبراطور ) .
الدوافع
يوم راجعوا الادله والشهود وحجج الغياب تم حصر المشتبه فيهم ودوافعهم بـ :
1) البرق الساطع..مرزوق دايم يسرق سيارته ويفحط فيها
2) رعد جده.. مرزوق دايم يغلبه في البلاي ستيشن
3) الدكتور .. مسلف مرزوق 50 ريال من قبل العام ولا رجعها له
4) نايت ايكو ..كان اذا فاز في مسابقة بالاستراحه يجحده مرزوق وياخذ الجائزه له
5) النايف .. دايم يصيد مرزوق يقطع تمر من نخلهم ويهربه للمنتدى
التفتيش وادله اضافيه
* يوم فتشوا سيارة البرق الساطع لقوا في سيارته قلم يرجع لمرزوق !!
* في وقت اعتقال رعد جده كان طالع من المنتدى وماسك معه مسوده بعد ما قروها اكتشفوا انها مسودة مرزوق الي يشخبط فيها مواضيعه قبل ماينزلها !!
* عند التحقيق وتفتيش جيوب الدكتور لقوا في وحدتن من مخابيه كبك مكتوب عليه اسم مرزوق
* بعد مانفضوا البنات شنطة نايت ايكو لقوا فيها محفظه والي اكد لهم انها لمرزوق انها كانت فاضيه مافيها الا لزقتن صغيره مكتوب عليها سلفني وبطاقة سوا مسجله باسمه !!
* النظر الثاقب بلغ ملائكة تشارلي انه لقى سبحة مرزوق طايحه في وحده من زوايا المنتدى بالرغم ( ترى بالرغم ذي مهيب سهله ) انهم فتشوا المكان بانفسهم من قبل ولا شافوها !!
الى هنا حنا نوقف
الحين يجي دوركم انتو .. بما ان القضيه وطنيه وتخص المنتدى واعضائه وجيرانه فحنا بنشارككم في التحقيقات وكل المعلومات الي توصلنا ..
وش المطلوب ؟
كل شي موجود قدامكم :
الخمسه المشتبه فيهم
الادله
الدوافع الي تخلي كل واحد منهم يكون المسؤول عن اختفاء مرزوق
كل الي عليكم انكم تلبسون بشت التحقيق وتحطون النظاره وتمسكون الورقه والقلم وتمضغون علك و تجلسون تربطون هالخرابيط ببعض وتعاونونا في معرفة :
1/ الخاطف .. المسؤول عن اختفاء مرزوق
2/ الدليل على ادانته
3/ الدافع الاساسي ورا الخطف
نبيكم تساعدونا في حل القضية عشان يرجع لكم مشرفكم مرزوق سليمن طيبن واللي ماصدق خبر انه راح ولا يبيه يرجع خير شر ويقول قلعته خلهم يذبونه مع السطح ونفتك منه لايستحي يقوله وحنا نضمن سلامته من كل شر
وبنعرض عليكم تطورات التحقيق مع المشتبه فيهم اولن باول بمجرد مانخلص منها
مع العلم ان هناك مكافأه مجزيه لمن يدلنا على الخاطف او العصابه ويتعاون مع ملائكة تشارلي وهي ترفيع لرتبه خاصه من العبره الحائره بزاتها ( بيورطونها)
نحنو في انتزاركم
ولا يزال التحقيق مستمرن
الإهداءات
08-04-2003, 05:41
adS 
.gif" border="0" alt="" title="Cool" class="inlineimg" />
العرض العادي
