فيروس الحب

كلميني عن حياتك وش تحبي؟ وش تخافي؟
كلميني لا يردك مستحى أو عنجهيه

كلميني بكل صراحه قبل لا أبعد واجافي
عن معاناتك وجرحك والظروف السرمديه

كلميني لا يغرك شاعر منتف وحافي
والله اني لي مشاعر غير عن كل البريه

هو صحيح ان القصايد رايحه فيها يا كافي
لكن الرك عالمعاني احلفي ماهي قويه؟

نرجع لمحور حديثي جاوبي يا قلب صافي
وش سبب حزنك وخوفك وش سبب هذا وذيه ؟

ما قنعتيني بردك يوم قلتي لي عوافي
عندي احساس بمراره نشترك فيها سويه

منيتي أعرف سببها يا الشعور الحيل دافي
يمكن ألقى في جوابك ما يبردها هنيه

من سنه والوجد ناره ما تطفيها المطافي
والزمن والحظ الاقشر كلهم صاروا عليه

كل ما قلت المحبه قالت الأيام مافي
شحت الدنيا الصبايا كنها صارت خليه !

واحرمتني من سعاده تكتمل لحظة زفافي
لعنبوها وش سؤالي؟ ما طلبت الا صبيه

البلا بفيروس حبي نام في حضن المكافي
لا وانا فبالي يعدي نورتن ويبطح خويه

كيف ابفلح بالمحبه والعشق يمشي خلافي
لو يطاوعني خفوقي وارفع بعشقي قضيه

ايه معروف بغروي ايه معروف بجفافي
وقسوة القلب وعنادي والتفاكير الغبيه

لكن الحب بالنهايه غصب عن مبعد ولافي
يدخل ويفرض مكانه لو بها موت ومنيه

ما يقول انسان فارغ ما يقول انك خرافي
ما يهم ان كنت عابد او بشر كلك خطيه

عنده البادي كتابه نفس من روض قوافي
والخبل والصاحي واحد كلهم من نفس حيه

بس لا دقيت بابه يعتبر نفسه اضافي
جت عالمحتاج يعني؟ تبت ايدين العطيه

يوه انا شكلي نسيتك وش تحبي وشتخافي؟
سامحيني مو بيدي اعتذر يا الأجوديه

وشهو رايك لو طلبنا مويه وبيبسي وكافي؟
وش تقولي لو خذينا وقت مستقطع شويه؟

صدقيني حيل منهك واحلم بجنبي لحافي
والكلام اللي ذكرته جدد جروحٍ خفيه

واحدث جروحي قصيده سجلي فيها اعترافي
" اكتشفت اني احبك " وانتظر ردك عليه ؟
24
ابريل
2003