(عارف) نصاك الشعر لا لا ترده = أسحب به الطاروق وإن شئت جاريه
من قول شاعر وقّف الوقت ضده = وفراق خلّه يأبن الاجواد باريه
إلى وضعت الرأس فوق المخده = يمرّ طيفه وأبتسم له وأحاكيه
وأعيش أنا وأياه لحظة موده = نقرأ حروف الشوق بأعلى معانيه
وتعاتبه عيني على كثر صده = نظراتها بين الوله والمشاريه
وأتوق له واللوم واصل لحده = والقلب يتحايا على حس طاريه
وأحاول أقرب منه وأمسك بيده = إحياء لذكرى مسكة أيديّ لأيديه
ويتجه فمي غصب صوب خده = ويختفي! وأفز و أصرخ واناديه
وأشد نهتاً يتعب الصدر شده = وأبقى الين الصبح وأنا أعانيه
هذا ترى حالي ولي فيه مده = لاعشت حبه (صح) ولاني بناسيه!!

لاهنــت يامــن بيّـح الوقت سده = مـما يـعاني بان للــناس خافيـــــــــه
يامعــرّب الساسين خـاله وجده = الوقـت و أمـوره على الله مشاكيــــه
الوقــت مثل السيف ياكـل بحده = قالوه أهل خبره وحكمه و توجيــــــه
والحــب و الهجــران واللـي تعده = اللـي تـعاني مـنه حـنا نعانيـــــــــه
الحــب عشـنا بيـن جزره و مده = وذقـنا مع الايـام مـره و حاليـــــــــه
وخلّــك لـيا قاطعـك مــرّ و تــعده = وإن كـان حـبل الوصل قطع عراويه
قــل يـالله إنـك لا علــينا تـرده = الـلي مقفّـي عنـك لا تـلتفت فيــــــــــه
وراع المــوده قابــله بالــموده = لـيا صـار هـو يغلـيك ملـزوم تغــليــه
خطــابكم جــاني وهــذا مـرده = جعلــه ينال إعجــاب سامــع و قاريــه
بمسكه و ريحانه و عوده و نده = لـ(يحيى ولد عيدان) بالطيب نهديه