رسالة للرجال السعوديين

ورد الخال · 20-05-2008, 08:51

تنهد محمد بشدة و هو يقود السيارة و بجانبه زوجته .. وسألها شفتي ذيك اللبنانية اللي في المحل وشلون تحاكي الرجال اللي معها؟؟تبينه رجلها ولا مخاوتيه؟؟

إلا رجلها شايفته يوم يلبس الولد جزمته بعد ما قاس عليه البنطلون
.
تجاهل ملاحطتها بالنسبه للتلبيس و تسائل بغباء:
وشلون؟؟

وش قصدك ..وشلون؟؟

ماسمعتيها وهي تقول شوف هالقميص حبيبي لونه حيصير يعقد لما تلبسه مع الجينز الكاكي من شان خاطري جربه يا روح قلبي.
وش يضركن يا السعوديات لو تسوون مثل هالأجنبيات..لطافة و شياكة وحكين يالله من فضلك

أولا :لو أقول لك ياحبيبي في المحل وطيت رجلي ..
ثانيا: الحريمه لابسه بنطلون جينز محكك ماشفت فيه أي بادرة شياكه
و بعدين تعال ، وراك خليت كل شي و ماسمعت إلا هالكلمتين الزينات.. ما شفته ما شاء الله وهو ياما شال البنية من العربية ياما حطها فيها ..ياما قاس اللبس على الولد ياما لبسه جزمته ..ويوم خلصت الحريمة منقية قال هاتي اللي بإيدك حبيبتي من شان وديهم لعند الكاشيير...مهوب مثلك أن كانك ذاك اليوم رايق و ذابحتك الرومانسية قلت إلى قضيتوا تراي واقف برا أحتريكم..
ياعمري وقلبي أنت تبي من يقول لك ياحبيبي و ياروح ألبي..ما يحصل ..اللي أوله شرط آخره نور ..شكلك نسيت يوم تقول لي أيام الملكة .ترى إذا قلت لك يا حلوة وحنا نتناقش لا تصدقين ..أنا دايم أقولها من باب السخرية و التهكم و لا أقصد فيها المدح أطلاقا..ما أقول إلا الله كلن يخليه لعميره و أهيله ..والله لا قايلة لك يا عمري ولا يا روحي.. الحب أحبك ..مانيب كاذبه بس هالكلمات يالله أقولها لعيالي إذا صخنوا...
حقيقة مع اني أبنه سعودي و زوجة سعودي و أم سعودي و في يوم ما بإذن الله سأكون (جدة ) سعوديين و أفتخر بهم جميعا .)
إلا أن الشغلة فيها بجاحة شوي . لا والله مهوب شوي إلا بجاحة بلا حدود'
أنت تبي زوجتك تقول لك كلام محبة و تعطيك عيونها وأنت في نفس الوقت ماتبي تعطيها عيونك ولا حتى نظارتك.
صراحة ...أشك أن السالفة سالفة أنكم بحاجة لكلام ناعم و ألقاب فقط (وأدري أن كل الموضوع حجة لتبررون به حبكم للأجنبيات الجميلات فقط ).. ولا هاذي فوزية الدريع طول برنامجها وهي يا عيوني و ياعيوني ..'كن منكب فيهن رماد 'و ما شفناكم مقابلين برنامجها.. القضية قضية وش شكل قائل الكلمة ؟؟
تبي زوجتك تحترمك وتغنج لك و تقول لك سم ولبيه و انت ردك عليها 'هها ؟؟بمعنى نعم ' أو وش هنا ؟؟
أنا أعرف ولد في المتوسط إذا ناداه أحد رجال او أمرأه رد ' سم ' ما يدري ان المرأة يقال لها 'سمي ' ليس لأن عنده مشكلة في القواعد و المذكر و المؤنث و لكن لأنه و بكل بساطة ما قد سمع رجال من اللي حوله يقول لحرمة ' سمي '

يا حليلك يالرجل السعودي عجيب وغريب و جرئ
غريب ..تبي زوجة أقدامها ناعمة و ركبها بيضاء وانت رجلينك كن الوحدة محراث تنور ..و اقدامك الشطب الواحد ممكن توزي فيه سكينة سويس ارمي
عجيب.. تبي زوجة تلبس جينز و تتشيك لك بتنورة وانت أربعة و عشرين ساعة صيفا و شتاء تدير و تاكل و تنام في اللبس السعودي الرسمي فنيلة بيضاء نص كم و سروال سنة .. ومهما شرت لك المسكينة من بيجامات من تخفيض دبنهامز أو ماركس و سبنسر ما لبستهن (هي تشتري مخفضة ليس تقليل من قيمتك و لكن لأن الأمل ضعيف في انك تلبسهم )

ياشباب!! ' الشياب توو ليت ماعاد فيه أمل يتعدلون' ّّّّّّّّّأنا متاكدة أن مافيه أنثى بتقول لها ' حبيبتي' و ترد عليك بجفاف ..الأنثى معطاء جرب تعطيها حنان و بترد لك أكثر .
الشي الثاني يا أبني لو أنت تشيكت و لبست داخل البيت مستحيل أم العيال بتجلس في خلاقين أو لبس أقل من اللي انت لابسة ..أصلا طبيعة الأنثى غيور و بتجاريك في لبسك تلقائيا يأما حتى ترتقي لمستواك_ أو_ عشان ما تعرس.
ومثل ما يقولون الأمريكان ' إت تيكس تو '

ذكرت سالفة طريفة و هي سالفة النجدية ' أم علي' اللي جتها جلطة عندما قال لها أبو علي ياعيوني بعد 40 سنه من الحياة الزوجية ماكانت تسمع فيها الا ياهيش و يامره .. و عندما سألوا أبو علي عن سبب التغيير المفاجئ ..أجاب :
بلاها والله بقرة ولا هل يعقل أني بعد 40 سنه أبي أقولها ياعيوني ؟؟ ماطرت علي ..بس ذا الخبلة أقول لها ياعيوني ذبحها اللقاح حق االنخل وهي اللي طارت بالعجة و حسبتني أنهبلت و بديت أقول لها يا عيوني ..الله ياخذ الروح قبل المكروه
ارجو من شبابنا يتدركون الوقت ولا يبخلون بلكلام الزين والنظاااافه
بسكم طماله وجلاااااافه

من ايميلي

الفـــراشــεïз · 20-05-2008, 09:55

معها حقها
حقه وماجاه
أجل يطلب حبيبي وبعد عمري في مكان عام ولاقالتها بيتوطى في بطن أهلها

واللي يسمعه يقول ساااايح من الرومانسية والغرام
بساتين ودي وعطر وردي

فتى الخليج · 20-05-2008, 10:37

يصلح له عنوان واحد .. كل اناء ما فيه ينضح

فيه رجال من هالنوعية وكمان فيه نساء من هالنوعية

فيه كذا وفيه كذا وكل واحد يغني على ليلاه وينام على الجنب اللي يعجبه وكل اناء ما فيه ينضح

***********************

يسلموووووووووو أختي ورد

كل الشكر والتقدير لكِ

دمتِ بكل الود والنقاء والصفاء

~&نــدى&~ · 06-06-2008, 05:38

طبعا" فلكل فعل رد فعل يساويه بالمقدار عندنا احنا الجنس الناعم يفوقه بالمقدار..فالمرأه بطبيعتها معطاءه ولكن هذا العطاء يحتاج لمن يقدره وداخلنا كنز من الحب والعاطفه ولكنها تحتاج لمن يبحث عنها ويتعاهدها بالرعايه حتى لاتجف...
ورد لاتبخلي علينا بالمواضيع الحلوه..

أمــيرة الكـون · 07-06-2008, 03:28

السلام عليكم ورحمة الله وبركاته
ღღ مساء الورد ღღ
المرأة في بداية حياتها الزوجية
تجاهد وتكافح وهي تظهر رومانسيتها لزوجها
مرة بالحركات وأخرى بالدلع وثالثة بالليالي الرومانسية
وهو جاف لايقدر (يقال له الرجولة ماتسمح له)
وفي منتصف الحياة الزوجية وعندما يصل الرجل لسن الاربعين وتكون المرأة استنفذت كل قواها وكل أفكارها وكل قدرتها يبدأ مراهقته المتأخرة ليبحث عن الرومانسية مع امرأة قتل هو فيها رومانسيتها ليدير ظهره ويبحث عن أخرى
صحيح شين وقوي عين

الله يحفظك يارب


الحوار الحر	صباحك ورد يا وطني	بلوتوث	حكيم روحاني

أدوات الموضوع
عرض نسخة صالحة للطباعة أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
في انتظار رسالة	وحيداً مع الصمت	أطياف وحي القلم	13	20-08-2007 12:04
رسالة «الرطيان» إلى «جورج» بست لغات	العبرة الحائرة	استراحة أطياف	0	30-07-2007 07:21
رسالة حب لم تقرأ	بندر	أطياف وحي القلم	10	06-06-2003 05:44
رسالة	شذا الربيع	أطياف وحي القلم	6	16-03-2003 02:10
دراسة رسمية: ثلث السعوديين عاطلون عن العمل	الدكتور	أطياف الحوار الحر	2	13-03-2003 12:48

الذين يشاهدون محتوى الموضوع الآن : 1 ( الأعضاء 0 والزوار 1)

الأتصال بنا \| الأرشيف \| الأعلى
	Powered by vBulletin® Copyright ©2000 - 2007, Jelsoft Enterprises Ltd. Search Engine Optimization

رسالة للرجال السعوديين

استراحة أطياف