هذي اخرت اللي ياخذ مدرسة ..

السلام عليكم ورحمة الله وبركاته،،
هذي الله يحييكم ويسلمكم قصه زوج وزوجته كانوا
عايشين في قمه الرومانسيه والحب وكانت الزوجه مدرسه وراتبها زين
مع الإعتذار لجميع الإخوة ممن زوجاتهم مدرسات .
وهذا الزوج جاء يوم من الايام وهو طفران .. ماهنا زود دراهم الله يخلف
وحصل زوجته توها مستلمه المعاش وهو اللي ينبسط, ويوم طلعت من
البيت. نقز للدرج اللي فيه الدراهم .. والقط سبعه الاف ريال فقط لا غير
المهم درت زوجته .. وازعلي واطلعي لبيت اهلها ونادت اخوها وتمردس
ببطنه وماخلى فيه عرق صاحي والله لا يوريكم .. لكن الزوج بعد ماصحى
وصحصح و استصح قال هالقصيده اللي كلها شجن وعاطفه بعد ما هجرته
زوجته بدون عوده اتمنى تنال اعجابكم و لكم تحياتي

<><><><><><><><><><><><><><>

لي زوجة حبه يتــل المعــاليق *** عرسي عليها العام باول شباطي

من روحته والزاد بالبيت ماذيق *** ولا اميز العلم القوي والخراطي

بياض وجهه من بياض الغرانيق *** وخدودها ياخوي مثل الطمــاطي

والصدر يزهابه عذاب العشاشيق *** والردف زامي فوقة الخصر واطي

ومدرسه مع زين كل التخاليق *** وزود على هذا تعـرف الخياطي

وجابت رويتبها وصفـقت تصفيق *** تسـعة الاف كلهن بالمــغاطي

وصكت عليه بغرفته بالصناديق *** وغطت على صندوقهن بالبساطي

وديتها تشري قدور واباريق *** وانا انطلقت للبيت يم الشناطي

واخذت سبعة الاف معهن تلاحيق *** وخليت انا الف وخمس معهن افراطي

عرفت وقالت عندك اليوم ماليق *** والله لوتربط برجلي ارباطي

وانا عرفت اني توهقت توهيق *** ياالله يارب اتهديـن الصراطي

وقالت لخوها كل شي بتوثيق *** وجاني حلال القوم راع النشاطي

ثمن ضربني ضربة تييبس الـريق *** وقام وفرشني فرشتة للــسماطي

وقام يتوطاني بليا ترافيق *** و يرجد علي ويمسحن بالبلاطي

واوجس بصدري عقب ضربه حشاريق *** قمت اتنفس عقبها من اباطي

لي تسعة ايام وانا بي تشاهيق *** عجزت اسولف كن فيني اصقاطي

براسي صعارير اسواة الزرانيق *** ومضارب بالبطن مثل المقاطي

ولا ضاق صدري قمت اجمع طوابيق *** و الى توسع قمت اجمع قــواطي

انا احمد الله بدّل الضوق بالضيق *** والهم من راسي نزل للمواطي


.....

منكم وإليكم والسلام عليكم

ونصحية لا تعرسون ولا لو على مطفرة

بصراحه يستاهل


عشان مره ثانيه مايتجرأ ويسرق زوجته في غيابها لو أنه مستأذن منها ماراح ترده

لكن للاسف اذا كان الزوج كذااااااااااااااااا
ههذا شوي ويصور حرمته صوره !!


ياشين الرجال اذا قام يوصف زوجته للناس؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

شكراعلى موضوعك والله يعطيك العافيه

يسرق زوجته

شكله متأثر بالافلام المصرية

نصيحة لكل ذكر بالغ راشد لا تأخذ ولا هللة من زوجتك

لأنها راح تذلك

تذكر يوم اسلفك ريال قبل 17 سنة