°°•°₪ زاويـة يـوميــة ₪°•°° ‏

خــوخـه · 05-07-2008, 08:28

جلساتنا ... مشاويرنا ... كلامنــا ... علاقاتنا مع الغيــر

كلنا نمر بمواقف يوميه تخلق عندنا حالة من التفكيــر

أو الإستغــراب ،،، أو المفاجأة ،،، أو الصدمــة

في هذه الزاويــة بمقدورنــا كتابة مواقفنا اليومية

كيف حدثت ؟ ماذا نتج عنهـا؟ ما الذي تعلمناه منهــا ؟

كنت أمس في جلسة نسائية بحتـة

أنا وأمــي وخــواتي

وضمــت الجلسة فئات مختلفة من الحـريم والبنات ومن مختلف الأعمار

بدت الجلسة بالسلامات والسوالف العادية جداً

لتتحول في غمضة عين إلى الحديث عن ارتفاع سعر الذهب

والغرام الواحد كــم وصـل ،،، وكــم كان قبل شهر

ثوانـي وانقلب الكلام عن السياحة وأهم الدول السياحية

وشو يميز كل دولة ،، وكم ساعة بالطيارة ،، وكم ساعة بالسيارة

وسعــر التذاكــر اللي ارتفع

بعــدهـا تغير الموضوع ودخلن في موضوع أهم

ألا وهو ( الأندومي )

وحده تقول إنها مفيدة للاطفال

والثانية تقول الدكتور منع عيالها من أكلها

وقفلوا على موضوع الأندومي بدون ما يوصلن لنهاية ترضي جميع الأطراف

ســوالف حــريم ما تنتهــي ،،، الحين بس تأكدت إن أنا صــح لما قاطعت جلساتهن

لانـــي كل مــرة أدخل وأنا جذيه وأطلــع وأنــا

خـذت سيارة أخوي اليوم العصر

بمــا إن سيارتـــي في المستشفــى

اكتشفت ان ما فيها بترول الا شوي

فقررت أخذ فيه أجــر وياليتني ما قررت

10 محطات بترول قريبة من بيتنا

بس لما مريت عليهن كلهن قلت أكيد البترول قرب يجف

ززززززحمــــة بشكل مب طبيعي

وتميت أفكــر وأفكــر

هــل فعلاً البترول قرب يجف ؟

وإلا عدد السيارات صار يزيد يوميا مع ازدياد عدد اللي تعلموا السواقة ؟

وكيف كنا بنعيــش بدون البترول ؟ وكيف كنا عايشين قبــل ؟

كنت أشوفه كل يوم الصبح يتريا باص المدرسة

وأرجع أشوفه مرة ثانية قبل مغيب الشمس بساعات وهو واقف في نفس المكان

بس هالمرة ما يتريا باص المدرســة وإنما يدخــن

وبما إن الدراسة خلصت صارت وقفته كلها للتدخين

ومن كم يوم اشتغلت فيني الشهامة وبصراحة قلبي عورني عليه توه صغير

قمــت وقفت سيارتي قريب منه وقلت له تعال

توني بتكلم الا وأمه طالعه من البيت

خيـر ؟ شو فيه ؟ شو تبغين من الولد ؟

لما لقيتها هجمــت علي ... قلت لها ولدج يوميا اشوفه يدخن

وبعد هالكلام قلت كلمتين ولما بغيت اقول الثالثة

هبت فيني ... وكأن ولدها على حــق

بس ما خليت شي في خاطري

قلت لها إذا الأم جذيــه فأنا ما ألوم الولد

وركبت سيارتي ورحــت

المشكلة اني كل ما أطلع من بيتنا لازم أمر عند بيتهم

دوركـــم

خــوخـه · 05-07-2008, 11:11

العبرة الحائرة · 06-07-2008, 02:23

هذي اخرة اللقافة يا خوخة.. خليه يدخن هو اللي راح يعدم صحته.. ومو كأنه ما يدري انها خطر... فلا اعتقد ان هناك من لا يعرف ان التدخين مضر بالصحة.. ولكنها مرحلة يمر بها الاطفال ففي اعتقادهم انهم هكذا اصبحوا رجال..

لا الوم امه انها هجمت عليك.. لو ابني كنت هجمت عليك كمان ابي اعرف وش تبين منه...!!! خاصة في هالزمن محد يضمن احد.. ولكن اكيد انها بعد ما رحتي راح تراجع كلامك وتراقبه... وقد تمنعه...فلا تزعلي

طبعا تبي تعرفي موقف مريت فيه

حقيقة مواقف كثير.. وخاصة الفترة الماضية مع إعادة الاستقرار ومحاولة التأقلم من جديد

اكثر شيء يقهرني هي الوصاية التي يفرضها المجتمع...

ولكن اذا رحتي للسوق او خرجتي في أي مكان.. تجدي ان كل من مشى بالشارع سوا نفسه وصي على الباقين... ستجدي احدهم او احداهن ...تليقف وجاء لك او لزوجك ليفرض عليه ما يراه هو صحيح.. وقد يكون أبعد ما يكون عن الصحة... لماذا لا يكون كل راع مسئول عن رعيته.. وليس على كل من حوله.. وعلى جيرانه وعلى من في السيارة التي تقف جنبه في الاشارة...

عشت في الخارج لسنوات طويلة وتعلمت ان احترم حق الاخرين... وخصوصيتهم واختياراتهم. ولا افرض رأيي على احد... فكل شخص مسئول عن تصرفاته وليس لي الحق في التدخل وفرض توجهي او اعتقادي عليهم....!!

اما هنا...!!! فأما انت مثلي او انك(.....)

وأكتفي بذلك قبل لا اطق وانفجر

الأستاذة · 06-07-2008, 08:51

.

.
.

صبــــاح الخيـــر
أما أنا ياخوخة حكايتي حكاية
تخيلي دخلت محل أشتري..
فأعطيت البائع 500 ريال ..
المهم طلع يصرفها بحجة إن ماعندة صرف ..!!
بعد ثواني بسيطة رجع وأعطاني فلوسي وقال :
مااقدر أصرفها
قلت لية ليش :
قال ناظري 500 ممسوحة من الوسط ..؟؟
المهم أخذتها ومادققت

المصيبة الكبيرة..!!
إن العامل أخذ فلوسي الصحيحة وبدلها بــ 500 مزورة

وأختك هالطيبة مادرت عن لعبتة الدنيئة إلإ بعد كم يوم
لما رحت السوق مرة ثانية وطلعت نفس الــ 500
فقال لي البائع :
مدام فلوسك هذة مزورة خبيها لايمسكونك الشرطة

ماصدقتة وقلت خلني أجرب ذكائي الفطري
ورحت لنفس البائع اللي بدللي الفلوس ..

قال لي بكل ثقة :
عطيها عيالك الصغار يلعبون قيها

والله العظيـــم إلى الآن مو مصدقة إن الغش والخداع وصل لمجتمعنا بهالسهولة
والمصيبة من هالحثالة الأجانب لابارك الله في اليوم إلإ دخلوا فية السعودية ..

بس تصدقين أحلى مافي الموضوع إني أول مرة أمسك بيدي فلوس مزوره
ياشيخة كنا نشوفها في الأفلام والآن صارت في جيوبنا

والله يستــــــــــر ..!!

~&نــدى&~ · 07-07-2008, 05:25

خوخه:: فكره رائعه..يارائعه..

المهم كنت مسافره مع زوجي للخارج..وسكنا في فندق وفجأه بعد كم يوم لاحظت انهم حاطين حراسه مشدده على الاوتيل..طبعا" انشكحت على بالي انه لنا لاننا كنا السعودين الوحيدين في المنطقه ذاك الوقت..طبعا صرت احس بأمان نوعا"ط ما يوم شفت الحراسه المشدده المفاجئه..
وفي آخر يوم نزلنا اللوبي وتلقفت ورحت اشكر الاستقبال على هالاهتمام والحراسه وبغيت اكتب خطاب للحكومه لانهم اهتموا بسلامتنا وبعز الكلام قاطعني الموظف وقال اسف مدام الحراسه ليست لكم ولكن للي ورائك ولما التفت وش لقيت؟؟آه يالقهر..لقيت جروب اسرائيلي جاي يزور البلد والحراسه لهم...خخخخخخخخ ..زوجي وقتها بغى يخمني بالمزهريه اللي جنبه بس قوانين البلد ماتسمح بخم النساء بالمزهريات..

والحمدلله انه كان آخر يوم ولا كان صارت علوم..

مايستفاد::الطيره بالعجه ماهي زينه وانا جدتكم..
عزيزي القارئ توقع لاتفقع وتجيب العيد مثل جدتك ندى...

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
هل فى الأرض ناس كالعرب ؟	الشقردي	استراحة أطياف	10	07-05-2007 09:17
أتصارحين ...	الأغـــر	أطياف الحوار الحر	28	16-04-2007 01:51
دعـــــــــــــوهــا ...!!!!	دجى	أطياف الحوار الحر	85	24-08-2006 02:45
مفتاح دخول الجنة 000	كوكتيل	الأطياف الإسلامية	1	22-06-2003 05:26

الذين يشاهدون محتوى الموضوع الآن : 1 ( الأعضاء 0 والزوار 1)

الأتصال بنا \| الأرشيف \| الأعلى
	Powered by vBulletin® Copyright ©2000 - 2007, Jelsoft Enterprises Ltd. Search Engine Optimization