[poet font="Simplified Arabic,4,blue,bold,normal" bkcolor="transparent" bkimage="backgrounds/20.gif" border="none,4,gray" type=3 line=200% align=center use=sp length=0 char="" num="0,black" filter=""]
طرف العيون الناعسه سهم صايب/ ياما شكى منّه جميـع الحبـايب/احـدٍ خلص منّه واحد فيه حـاير
ونا الـذي لا زلت اشكي اللهـايب/ من سهم صوبني وصاحبه غايب/ قفّى وخـلاني على البعد مقهور
ادري بحبّـه صـادقٍ غير خـايب/ ويـدري بحبّـي دايـمٍ فيه ذايب/ نبني الامـاني لكن الوقت جاير
باسبـاب خط وخط عشنا المصايب/ واحـلامنا ضـاعت بتفكير شايب/ يقول يابني خذ اصيله من الحور

حـاولت جهـدي اقنعـه بالدليـله/ هـذا كتــاب الله دايـم تشيـله/ الفرق في التقوى وطيب الضماير
ما هـوب لاصـل وفصل والا قبيله/ الكـل لآدم والخــلايق رعيـله/ هـذا كـلام الله في رقّ مسطور
والحبّ يـابـا من دروب الفضيـله/ ما حـرمّه ربّـي بآيـه جليـله / وانسان ما له حبّ تلقـاه طاير
ودّه يحصـل حـبّ بايـة وسيـله / حب اصيـلٍ من قلـوب أصيـله/ ماهوب حب الغش والكذب والزور

اقسم عليّ وقـال هـذا قـراري / ما ارضاك تاخذ من بنات السراري/ خل الحكي عنك ترى الدم فاير
الله ومـرك بطـاعتي واصطباري/ وانته تطيـع ابليس تبغى احتقاري/ان كان جاهل افهم العلم والشور
الحب يا ابني من طبـاع الخكاري/ اللي طـوال الوقت كاس وجواري/ والا بجـواله في الاسواق داير
الحب عشره من زواج اعتبـاري / ما هـوب متعة وقت والا تجاري / ان كان ما تسمع فلا شك مسحور

ضاقت بي الدنيا ولو هي وسيعه / كلمتها بالعـلم ، قـالت خـديعه/ اعرف هدفك وعارفه بالسراير
لكن ترى الأيـام تركض سريعه / لك يـوم يالظـالم وارد الـوديعه/ تدفع ثمن غلطتك يالبيه مغرور
من عقبهـا مـا بيّنت بالبديعـه/ والبيت فـاضي ما بقى الا رجيعه/ ولا حدٍ عرف للجـارلا وين ساير
ومن بعدها ما شفت غير القطيعه/ وقلبـي يتقطع ذاهـل من الفجيعه/ مقدرعلى النسيان بالقلب تنور

مشيت انا انشد شارد البـال هايب/ تاهت خطاي وما تركت السبايب/ وفي الاخره ضاعت جميع البصاير
واصفط بجنب جــدار بلحيل عايب/ القط نفس من جهد شد الركايب / والا عجـوزٍ اشرت بآخر السور
قـالت توصّـلني ينـوبك ثـوايب / مالي احد مقطوعة من القرايب/ ولا ني من اللي يركضن للطراير
ركّبتهـا أرجـي جزيـل الوهايب / الشارع أظلم والحـواري غرايب/ أسوق وتشّر كنّي العبـد مامور

وفي حـارة واضح سككها رزيـله/ مهجـورٍ اغلبهـا لمده طويله/ قالت وصلنا وقلطتك لي بشاير
تقسم عليّ ايمــان غلظه ثقيـله / وادخـل بويتٍ بالفقر طال ليله/ خرمس بليا سراج ولا وصله النور
جابت أبـو دنـان تشعـل فتيـله/ والقهوه بترمس ومسمار هيله/ وقمت اتفنجل والسوالف حداير
وخـذت اتفكّر في الفقر والرذيله/ فالبعض رغم الفقر نفسه جزيله/ ما ينحني راسه ولا يقبل الجور

فجأه يطق الباب من غير طـاري/ وتطمرعجوزي مثل حصني البراري/ وتدخل غزال كنها الذيب غاير
متستره والصوت فيه انكساري/قالت سلام بهمس خلف الستاري/وكني عرفت الوجه مع شقحت النور
ولمح عجوزي طالعه في وقاري/ صكت علينا الباب دون اعتذاري/ وجتني الغزال ودمها حيل فاير
قمت ابرحب ، قالت اليـوم ثاري/ مصيود يالطير المهـاجر بداري / يا ما حرقت القلب ما عندك شعور

ما اقسى فؤادك ول ، ياما القطيعه/ فعلتك في قلبي تراها شنيعه / سن بسن وقلب عن قلب طاير
ما هوب حكمي بس حكم الشريعه/ حكم القصاص وواجب انا نطيعه/ من ينقذك ، هذي هديتك ساطور
قلت العفو با ام العيـون الوسيعه/ يا قلبي اللي ما تهنـا بربيعـه / عندي طلب من قبل دمي نثاير
من صـاحب الخطه تراها فظيعه/ قالت بسيطه في زمان الخنيعه / القرش يشري ما تبي دون محذور

ممكن طلب آخـر ولا به ضرايب / ضم القلب مع قلب ينوي الحرايب / ثم اقتليني وقطعيني شطاير
بعـد الطلب والكل دمعـه سكايب / نبـدا نتحدث بالعقل في العقايب/ لكن بلا احلام فالحلم محظور
كل يتجوز في زمــان العجايب / ما هو على كيفه وهذي مصـايب / امّا عنوسه او طلاق وخساير
والا انحـرافٍ واضح لكل صايب / يجري بنا التيـّار والعقـل غايب / واللي بعقله قلبه اليوم مفطور

[/poet]