اسمعي قصة غرام الشاعر اللي من عيونك ما عرف يكتب قصايد والشعر عنده مطيه لا دعاها نوخت له واطلبت شد الركايب

قصتي يا بنت ابوها تختلف فيها الهقاوي ذا يقول اني متيم في هوى الطايف وابهى والقريب اللي عرفني قال جده والمدينه

لعبة التخمين صارت عندهم مثل الحكاوي من عقب ذيك القصيده يومني صرحت فيها " لي هوى سعودي وعودي لا عزف جاب الطلايب

اي نعم عشقي سعودي والفكر والوجد ذايب في سعوديه اخطفتني من قطر غصبا عليه واسكنت روحي رياضٍ اسمها اليد الأمينه

اسمها اليد الأمينه وعمرها التوحيد شاهد كم مدن جت من قبلها ولا قدرت توصل سماها والتحدي ما يطوله غير فكاك النشايب

يا رياض العز لبى خافقك شاعر خيالي ما عشق قبلك مدينه ولا عشقك بعدك مدينه والسبب جادل هواها ماخذن روحه رهينه

جادلٍ الله عليها حسنها شيٍ خيالي مرضعتها العامريه وخادمتها كيلوباترا واللي تصفف شعرها بنت من اهل النجايب

ان مشت صفت عساكر وان حكت قالت قصايد وان شكت فزت قبايل وان بكت سالت مدامع وان ضحك مبسم شفايف خدها يالله تعينه

هي بعد قلبي وروحي والعمر قاصر وزايد والشعور اللي معاها مختلف عن كل ناهد هي بعد عمي وخالي هي بعد كل القرايب

تامر وتنهى وتطلب وش تبي سمعا وطاعه لجلها العنقا وغولٍ ما عرفنا وش وصوفه والخوي صاحب رفيقه في زمن ضايع حنينه


لجلها والله لجيبك يا المحالات الثلاثه لين ما ترضى حبيبة خالد الشاعر وتقنع وان بغت فوق الثلاثه جاتها السبع العجايب


دامها استولت ضلوعي والعروق اللي بخفوقي وش علي امن العقارب لا بغت لدغة لساني والبحر ما قد سمعنا خاف من اهل السفينه

لايمي لا لا تحاول تطمس الفرحه اليتيمه ما اظن قلبي يلاقي مثلها بين العذارى لو غدى ظهري محودب والشعر بالراس شايب

لايمي ادري حدودك من ابو سمره ونازل والخيال اللي بفكرك ما برح طوقه مكانك والعتب لا صرت واقف بين فل وياسمينه

ابصم العشره واثني بصمتي بقلب وحنايا للرياض اللي شذاها عطر الدنيا دخونه وارقصت منه الخزامي وانتشت فيه السحايب

الرياض اللي عطتني شهرزاد الشاعريه بنت عن مليون وحده من بنات الجيل هذا والزمن فيه الأسيه مثل ما فيه السكينه

نيتك يا شيخ تكفى وحدها هي المطيه احسن النيه وخلها صافيه وابشر بربك هازم الاحزاب وحده يوم ساقوا له كتايب

كيف لو كانت حياتك ظلم هذا وسلب ذيه والامل عندك تصافح قلب طاهر في يمينك والطهاره عن يسارك جالسه تبكي سجينه

ليت لي شعر الفرزدق واكتب بخلي قصايد ابتدي بكلمة "احبك " يا بعد وجدان خلك وانتهي فيها بدعائي ربنا خلنا حبايب

والأماني يا كثرها لو تشوفين الأماني نصفها ودي تكوني كل اوقاتك معايا والبقيه يا حياتي عاشقك لا تطلقينه

عاشقك لا تطلقينه لو تغيرك الليالي والمسا يفقد صباحه والقمر يرثي نجومه والفرح يصبح حضوره عن سما عاشقك غايب

يكفي احساسه بقربك يسوى كل اول وتالي يللي في وصالك تمنى عاكف المسجد يصلي ركعته ويخر ساجد لجل يدعي انك تجينه

وقبل لا اختم حروفٍ انتي المقصوده فيها يللي والله من عيونك ما عرفت اكتب قصايد والشعر عندي مطيه نوخت رغم النوايب

قبلها ودي ابوسك يا العيون المستحيه لين ما يرضى خفوقي واسمع صراخه يلجني "باسها وجد الكتابه باسها ابن اللذينه "
18
يونيو
2003