سلامو عليكم
هذي بعض نماذج لاعضاء يغثون التسبد ومحسوبين علينا بالنت كمالة عدد وماظن لهم داعي ابد
ملاحظه كبر الجدار تراي ماقصد بكلامي احد بذاته يعني لا تنشبونا مع احد
======================
عضو خلف خلاف
يدخل ابو الشباب للمنتدى ويحصل له موضوع ، راعيه يقول ترا الشمس تطلع سبع مرات في الاسبوع ، ومية عضو ردو وكلهم موافقينه ، متفقين وما للخلاف بينهم بينه
وفجأه يطلع لهم الهدر خلف خلاف ويقول لهم لا يا حمقى يا جهال ، يالي مركبين بدل المخ نعال ، الشمس ما تطلع بالاسبوع الا خمس مرات انا حاسبها وبعد اكدو لي الثقات
وبعد مده ينسى الي هو قال ، ويدخل موضوع يقول راعيه الشمس تطلع خمس مرات بالاسبوع يا عيال
ويرد عليه خلف خلاف : لا يا غبي يا مجنون ، لعنبو بليسك الملعون ، انت ما تدري ان الشمس بالاسبوع تطلع تسع مرات ونص وان صارت السنه كبيسه طلعت مره ونص ورئصني على وحده ونص
واحلالات من ربط ذا الهدر وسط صفة اعلاف ودخل عليه بعارين مجاهيم وخلاف ، وخلاهم يرعون في حوض بطنه وساعتها بيشوف شي ما انشاف لحد ما يغدي رجل ويترك عنه الخلاف فقط من اجل الخلاف
======================
عضو خروف
يدخل ابو الشباب للمنتدى وهو مسرور بعد ما برمج عيونه يسوون اقنورر ، لكل موضوع او رد كاتبه تمساح عشان يطامر ورا البنيات وهو مرتاح يرد على هذي ويتميلح مع هذيك ويرسل رسايل لذي وذيك ومافي قاموسه الا يا فلانه انا مغليك ويا علانه انا ابيك ويا بعد روحي بروحي انا افديك وان خمته يوم يكتب موضوع ، احمى كبدك بشين ذاك الموضوع ، يقعد يمدح روحه ويوصف جماله ويحكي عن طيبة قلبه وعن حسنه ودلاله على باله من قرا خرابيطه من الاناثي تسدحت وقالت wooow ليتني اصير حلاله
واحلالات من رماه وسط عزبة افغان ، عمرهم ما تروشو ويفوح منهم الصنان ، لما يعرف ان الله حق ويركد عن حركات الخرفان ، ويبدا يرد على الرجاجيل الشهبان اللهبان
======================
عضو باثمه مصاصه
يدخل الرضيع للمنتدى شايل سيفه ويبي الجميع يمشي على كيفه يدخل موضوع يقولون فيه الكامري احسن شي ، ويرد عليهم ويقول اصلا انتم ما تفهمون شي الماكس هذي اسطورة العصر ، والي فيه خير يقابلني العصر ، ويرد عليه عضو مثله من اصحاب المصاصه ويقول له يا دلخ جعلك تحت اقرب رصاصه ، الكامري هذي بالخط رصاصه ، وتمسك بالاسفلت تقل شباصه
وكلمه منه على كلمه منه تقلب هوشه وتلعين وكلام شوارع والي يشوفهم يقول ذولا عرابجه وطول عمرهم هياته بالشوارع وفي الواقع عمر هذا ولا هذاك ساقو سياره وحد الواحد منهم مره ركبه ابوه بحجره ومسكه الطاره
======================
عضو يهك على هنود
يدخل العضو للمنتدى حافظ له كليمتين ، من كلام كم فيلسوف وثني من الي مبطي ميتين ويدحلس في الكلام ، ويموه في المعاني والمرام ويبدا يخربط ويقول لازم ننقي الدين من الشوائب ، ولازم نصفي معتقدنا من الذوائب من يقول الصلاة هذي واجب ؟ هذي سنه مؤكده ، وكل الادله على وجوبها محرفه ومن يقول الصوم هذا فرض ؟ ابدا ما اقره ولا عالم من علماء الارض الصوم مستحب للي وزنه فوق الميتين ولا يستحب ابدا للنحيفين وهذا الكلام وافقني عليه عالم جليل ، اسمه عبدالجليل ، شفته يمشي بالشارع تالي الليل واما ما سواه وسواي فجميعهم لا يفهمون في الدين فهيا ايا اخوتي واني لكم لمن الناصحين هيا ينا نصفي الدين <<<<<< يا وليدي انت تلعبها على مين ؟؟ وانت تتكلم عن اي دين ؟؟؟ هو انت يا روح امك خليت فيها دين ؟؟؟
======================
عضو سطل
يدخل العضو للمنتدى كدخول البلهاء متكي اصبع رجله الصغير على حرف الهاء وفي ايده ختم مكتوب فيه ( الله يرجك ) واي موضوع يقابله وبدون ما يقرا حرف واحد من الموجود ، يظغط زر اضافة رد وينثر فيه رده المعهود ( هههههههههههههه الله يرجك )
فتحصله يدخل موضوع واحد يعزونه في وفاة امه واخينا ينثر رده ( هههههههههههههه الله يرجك ) ويطلع
ويدخل موضوع ثاني لواحد يشكي بلاوي الزمان واخينا يرضه ينثر رده ( هههههههههههههه الله يرجك ) ويطلع
ويدخل موضوع وحده تقول زوجي بيطلقني دبروني واخينا برضه ينثر رده ( هههههههههههههه الله يرجك ) ويطلع
======================
عضو شكشوكي
وهذي النوعيه من الاعضاء مافيهم رجا ابد وما عندهم ما عند جدتي وما عندها سالفة ابد
======================
مع تحياتي
عظيم الشوق
ملاحظه ::: الموضوع ملطووووووش|3|
الإهداءات
10-08-2003, 06:32
العرض العادي
